ചരിത്രപശ്ചാത്തലം
)
1895ൽ സ്കോട്ടിഷ് മേജർ ആയിരുന്ന ജോൺ പെനിക്യൂക്ക് 50 വർഷം കാലാവധി നൽകി സുര്‍ക്കയും ശര്‍ക്കരയും ഉപയോഗിച്ച് നിർമ്മിച്ച മുല്ലപ്പെരിയാർ ഡാം ഇപ്പോൾ 129 വർഷം പിന്നിടുന്നു. തലക്ക് മുകളിൽ നിൽക്കുന്ന ഈ അണക്കെട്ടിൻ്റെ സുരക്ഷയെ സംബന്ധിച്ച് കേരളത്തിലെ ജനങ്ങൾക്ക് ആശങ്കയുണ്ട്. തമിഴ് നാടിന് വെള്ളം നിഷേധിച്ചുകൊണ്ടുള്ള ഒരു ഒത്തുതീർപ്പും പ്രാവർത്തികമല്ല. എന്നാൽ മുല്ലപെരിയാർ ഡാം തകർച്ചയിൽ നിന്നും കേരളത്തിലെ ജനങ്ങളുടെ സുരക്ഷയും പ്രധാനമാണ്. വേണ്ടത്ര മുൻകരുതലുകൾ എടുത്താലും ഇനിയും വന്നേക്കാവുന്ന ഒരു ദുരന്തത്തെ അഭിമുഖീകരിക്കാൻ ഈ അണക്കെട്ടിന് കഴിഞ്ഞെന്നു വരില്ല. മുല്ലപ്പെരിയാർ ഡാം വിഷയത്തിൽ കാലതാമസം കൂടാതെ വളരെ വേഗത്തിൽ നടപടികൾ സ്വീകരിച്ച് അത് പ്രാവർത്ഥികമാക്കണമെന്ന കേരളത്തിലെ ജനങ്ങളുടെ ആവശ്യത്തിനുവേണ്ടി തുടങ്ങിയ കൂട്ടായ്മയാണ് “സേവ് കേരള ഫ്രം മുല്ലപ്പെരിയാർ ത്രേറ്റ്‌സ്”
1895ൽ മുല്ലപ്പെരിയാർ ഡാമിൻറെ നിർമ്മാണം പൂർത്തിയായ സമയത്ത് അന്നത്തെ ബ്രിട്ടീഷ് ഗവൺമെൻ്റും തിരുവിതാംകൂർ രാജാവും (സത്യത്തില്‍ രാജാവ് വിശാഖം തിരുനാള്‍ രാമവർമ്മ അല്ല ഒപ്പ് വച്ചിരിക്കുന്നത്, ഒപ്പ് വച്ചത് അന്നത്തെ ദിവാനായ വെങ്കയ്യ രാമയ്യ ആണ്, അതും വിശാഖം തിരുനാള്‍ രാജാവ് മരിച്ച് 14 ദിവസം കഴിഞ്ഞാണ് ഒപ്പ് വച്ചിരിക്കുന്നത്) ചേർന്ന് തമിഴ്നാടിന് 999 വർഷത്തെ പാട്ട കരാർ ചെയ്തുകൊടുത്തു. നിര്‍മ്മാണ സമയത്ത് തന്നെ ഡാമിന്‍റെ ഒരു വശം പൊട്ടിയതാണ്. ഒരു മനുഷ്യായുസ്സിന്റെ പത്തിരട്ടി വരുന്ന ഇത്രയും വർഷത്തെ ഒരു കരാർ ഒരു അധികാരികൾക്കും ചെയ്യാൻ അധികാരമില്ല. 1941ൽ തിരുവിതാംകൂർ ദിവാനായിരുന്ന സർ സി പി രാമസ്വാമി അയ്യർക്ക് മുല്ലപ്പെരിയാര്‍ ഡാമിന് മേല്‍ തമിഴ്നാടിന് ഒരു അവകാശവും ഇല്ലെന്ന് വിധി ലഭിച്ചിരുന്നു. 1947ൽ തിരുവിതാംകൂർ രാജാവ് ശ്രീ ചിത്തിര തിരുനാൾ ബാലരാമ വർമ്മ മുല്ലപ്പെരിയാർ ഡാം ഒഴിവാക്കണമെന്ന് വിളംബരം ചെയ്തിരുന്നു. സ്വാതന്ത്ര്യം ലഭിച്ച് കഴിഞ്ഞപ്പോള്‍ എല്ലാ നാട്ടുരാജ്യങ്ങളുമായുള്ള കരാരുകള്‍ അവസാനിപ്പിച്ച രീതിയില്‍ നമുക്ക് സ്വാതന്ത്യം ഡിക്ലയര്‍ ചെയ്തിട്ടാണ് ബ്രിട്ടീഷുകാര്‍ പോയത്. സ്വാതന്ത്യം ലഭിച്ച് കഴിഞ്ഞ് കാരാര്‍ പുതുക്കലിന്‍റെ പരാജയ ശ്രമങ്ങള്‍ 1958, 1960, 1969 വര്‍ഷങ്ങളില്‍ നടന്നിരുന്നു. പക്ഷേ നിര്‍ഭാഗ്യവശാല്‍ 29 മെയ് 1970 ല്‍ കരാര്‍ പുതുക്കപ്പെട്ടു.
1953 ല്‍ പണിതീര്‍ത്ത തുംഗഭദ്ര ഡാമിന് പറഞ്ഞത് 70 വര്‍ഷമായിരുന്നു. 71 വര്‍ഷമായപ്പോള്‍ എന്താണ് സംഭവിച്ചതെന്ന് നമുക്കറിയാമല്ലോ. ഇതൊരു സൂചന തന്നെയാണ്. ലോകം മൊത്തമുള്ള കാലാവസ്ഥയുടെ വ്യതിയാനവും നാം മനസ്സിലാക്കേണ്ടതാണ്. കേരളത്തില്‍ ഇപ്പോള്‍ ധാരാളമായി മഴ ലഭിക്കുന്നു എന്നുള്ളതും ഒരു വിഷയമാണ്. മുകള്‍ വശങ്ങളില്‍ പേരിന് മാത്രം കുറച്ച് സിമിന്‍റും മറ്റും ഉപയോഗിച്ചു മെയിൻ്റനൻസ് നടത്തി എന്നത് ഈ ഡാമിന്‍റെ സേഫ്റ്റിക്ക് ഗുണമാകണമെന്നില്ല. വിദഗ്ദ സമിതികള്‍ പറയുന്നത് ഈ ഡാം സേഫല്ല എന്ന് തന്നെയാണ്. എല്ലാ ഡാമിനും ഒരു ആയുസ്സ് ഉണ്ടെന്നിരിക്കെ മുല്ലപ്പെരിയാര്‍ ഡാമിന് മാത്രം എന്ത് കൊണ്ട് ആയുസ്സില്ല. ഒരു ഡാം ബ്രേക്കിംഗ് അനാലിസിസ് പോലും നടത്തിയിട്ടില്ല. ഇത് ഇന്‍റര്‍നാഷണല്‍ ഏജന്‍സിയാണ് ചെയ്യേണ്ട്, കാരണം നമുക്ക് അത്തരത്തിൽ നല്ല ഒരു ഏജന്‍സിയില്ല. കാലപ്പഴക്കം ചെന്ന ഈ ഡാം സേഫ് ആണോ എന്ന് പഠിച്ച് സമയം കളയേണ്ട ആവശ്യവും ഇല്ല. ഇതിനെല്ലാം പുറമേ ഡാമിനെ തമിഴ് നാട് ഗവൺമെൻ്റിൻ്റെ അധീനതയിൽ വെച്ച് പൊതുജനങ്ങളുടെ ഡാം സന്ദർശനം നിരോധിച്ചതും ജനങ്ങളുടെ സംശയങ്ങളെ ബലപ്പെടുത്തുന്നുണ്ട്.
ലക്ഷ്യം
ഞങ്ങളുടെ ലക്ഷ്യം എന്തെന്നാൽ നിലവിലുള്ള മുല്ലപെരിയാർ അണക്കെട്ടിൽ അറ്റകുറ്റ പണികൾ നടത്താതെ തന്നെ മറ്റു മാർഗ്ഗങ്ങൾ സ്വീകരിച്ച്, നമ്മുടെ സഹോദര സംസ്ഥാനമായ തമിഴ് നാടിന് വെള്ളവും കേരളത്തിന് സുരക്ഷയും ഉറപ്പ് വരുത്തി രണ്ടു സംസ്ഥാനത്തിനും ഗുണകരമായ ഒരു നിലപാട് എടുക്കുക എന്നതാണ്. മുല്ലപ്പെരിയാര്‍ ഡാമിൻ്റെ ഭീഷണിക്കറുതി വരുത്തിയേ മതിയാകൂ. അടിയന്തിരമായി പ്രൊഫസർ സി പി റോയിയുടെ നിർദ്ദേശങ്ങൾ പ്രാവർത്തികമാക്കുക. അല്ല എങ്കിൽ ശാശ്വതമായ പരിഹാരം എത്രയും പെട്ടന്ന് കണ്ടെത്തി നടപ്പിലാക്കുക.
ലക്ഷ്യത്തിലേയ്ക്കൂള്ള മാർഗ്ഗങ്ങൾ-
മുല്ലപെരിയാർ വിഷയത്തിൽ നടപ്പിലാക്കാൻ സാധിക്കുന്ന ഒരു മാർഗ്ഗമാണ്, 2011 പ്രൊഫസർ സി പി റോയ് നിർദ്ദേശിച്ചത്. ഡാമിൻ്റെ ഹൈറ്റ് 155 അടിയാണ്. തമിഴ്നാട്ടിലേക്ക് ഇപ്പോൾ വെള്ളം കൊണ്ടുപോകുന്ന ടണൽ മുല്ലപ്പെരിയാറിൻ്റെ അടിത്തട്ടിൽ നിന്നും 105 അടി ഉയരത്തിൽ സ്ഥിതിചെയ്യുന്നു. 105 അടിക്ക് താഴേക്കുള്ള വെള്ളം ഡെഡ് സ്റ്റോറേജാണ്. മുല്ലപ്പെരിയാറിൻ്റെ അടിത്തട്ടിൽ നിന്നും 50 അടി ഉയരത്തിൽ പുതിയ ഒരു ടണൽ നിർമിക്കുക. അപ്പൊൾ മുല്ലപ്പെരിയാർ ഡാമിൻ്റെ ജല നിരപ്പ് 50 അടിയിലേക്ക് താഴ്ത്താൻ സാധിക്കും. ഈ 50 അടിയുള്ള വെള്ളത്തിന് ഡാമിനെ തള്ളി കളയാൻ ഉള്ള ശക്തി ഉണ്ടാവുകയില്ല. പുതിയ ടണൽ നിർമ്മിച്ച് ജലനിരപ്പ് താഴ്‌ത്തിയാൽ മുല്ലപ്പെരിയാർ ഡാം ഡികമ്മീഷൻ ചെയ്യുന്നതിന് തുല്ല്യമാകും. 50 അടിയിൽ ടണൽ നിർമ്മിച്ച് കൊണ്ട് തമിഴ് നാടിന് 55 അടി വെള്ളം കൂടുതൽ കിട്ടും. അതുവഴി തമിഴ് നാടിനു വെള്ളത്തിൻ്റെ ലഭ്യതയും വർദ്ധിക്കും. 2012 ൽ പ്രൊഫസർ സി പി റോയ് ഈ നിർദ്ദേശം സെൻട്രൽ വാട്ടർ കമ്മീഷന് കൊടുത്തിരുന്നു. തുടർന്ന് ഈ നിർദ്ദേശം പ്രായോഗികമാണ് എന്ന് സ്ഥിരീകരിക്കുകയും സെൻട്രൽ വാട്ടർ കമ്മീഷൻ സുപ്രീം കോടതിയിലേക്ക് റെഫർ ചെയ്യുകയും ചെയ്തു. 2014 മെയ് 7നു ഇറങ്ങിയ സുപ്രീം കോടതി വിധിയിൽ 148 മുതൽ 152 വരെയുള്ള പേജുകളിലായി, പുതിയ ടണൽ നിർമ്മിച്ച് ജല നിരപ്പ് താഴ്ത്തി കേരളത്തിൻ്റെ സുരക്ഷയും തമിഴ് നാടിന് വെള്ളവും ഉറപ്പാക്കണമെന്ന് കൃത്യമായി പറഞ്ഞിരിക്കുന്നു. പ്രൊഫസർ സി പി റോയിയുടെ ഈ നിർദ്ദേശം എത്രയും വേഗത്തിൽ നടപ്പാക്കുന്നത് വഴി ജനങ്ങളുടെ ആശങ്ക പരിഹരിക്കാൻ സാധിക്കും.
ഈ വിഷയത്തിൽ നടപ്പിലാക്കാൻ സാധിക്കുന്ന മറ്റൊരു മാർഗ്ഗമാണ് തമിഴ്നാടിന് കക്കി ഡാമിൽ നിന്ന് വെള്ളം കൊടുത്ത് പ്രശ്നം പരിഹരിക്കുക എന്നത്. കക്കി ഡാമിൽ നിന്നും വെള്ളം നൽകിയാൽ, മുല്ലപ്പെരിയാർ ഡാമിൽ ഇപ്പോഴുള്ള 132 അടിയിൽ നിന്നും ഹൈറ്റ് 60 അടിയാക്കി കുറക്കാൻ സാധിക്കും. തമിഴ് നാടിന് മുല്ലപ്പെരിയാറല്ല വിഷയം, അവരുടെ അഞ്ച് ജില്ലകളിലേക്കുള്ള വെള്ളം ആണ്. കക്കി ഡാമിനെ ആശ്രയിച്ചാല്‍ അത് പരിഹാരമാകും. ഒപ്പം നമുക്ക് മുല്ലപ്പെരിയാറിനെ സേഫാക്കി മാറ്റുകയും ചെയ്യാം. കക്കി ഡാമില്‍ നിന്നും പുതിയൊരു ടണൽ മുല്ലപ്പെരിയാർ ഡാമിൽ നിലവിലുളള ടണലിലേയ്ക്ക് കണക്ട് ചെയ്ത് തമിഴ്നാട്ടിലേക്ക് വെള്ളം എത്തിക്കാൻ സാധിക്കും. ഇതിൽ നിന്ന് ഏതു മാർഗ്ഗം സ്വീകരിച്ചാലും മുല്ലപ്പെരിയാർ പ്രശ്നം സുഖകരമായി തീർക്കുവാൻ സാധിക്കും.
ഞങ്ങൾ കേരള സർക്കാരിനോ തമിഴ്നാട് സർക്കാരിനോ മറ്റ് രാഷ്ട്രീയ പാർട്ടികൾക്കോ എതിരല്ല. ഞങ്ങളുടെ ലക്ഷ്യം ഒത്തൊരുമയോടെ നിന്ന് മുല്ലപെരിയാർ വിഷയത്തിൽ അടിയന്തരമായി പരിഹാരം കണ്ടെത്തുക എന്നതാണ്. മുല്ലപ്പരിയാറില്‍ പുതിയ ഡാം എന്നതാണ് സര്‍ക്കാരിന്‍റെ ആശയമെന്ന് മന്ത്രി റോഷി അഗസ്റ്റിൻ പറഞ്ഞു. പുതിയൊരു ഡാം പെട്ടന്ന് നിർമിക്കുക എന്നത് പ്രായോഗികമല്ല. പകരം അപകടാവസ്ഥയില്‍ നിന്ന് അടിയന്തിരമായി നിർദ്ദേശിച്ചിരിക്കുന്ന മാർഗ്ഗങ്ങളിലൂടെ ഡാമിനെ സുരക്ഷിതമാക്കുകയാണ് ചെയ്യേണ്ടത്. അതിനായി നടപടികൾ സ്വീകരിക്കണം എന്നുള്ളതാണ് ഞങ്ങളുടെ ആവശ്യം.
കേരളത്തിന് സുരക്ഷയും തമിഴ് നാടിന് വെള്ളവും എന്ന വിഷയത്തിൽ തീർപ്പ് ഉണ്ടാകുന്നത് വരെ ഞങ്ങൾ പരിശ്രമിക്കും. ജനങ്ങൾക്ക് ഈ വിഷയത്തിൽ ഭീതി ഉണ്ട്. ഞങ്ങളുടെ ഭീതിയേ മാറ്റിയേ മതിയാകൂ. അതിനാൽ തന്നെ തന്നെ ഞങ്ങളുടെ അവശ്യം നിറവേറ്റാതെ ഞങ്ങൾ പിന്നോട്ടില്ല. അതിന് സമര പരമ്പരകള്‍ വേണ്ടി വന്നാലും ഞങ്ങള്‍ ചെയ്യൂം. ലക്ഷ്യങ്ങൾ നടപ്പിലാകും വരെ മാര്‍ഗ്ഗം സമാധാനപരമായ സമരങ്ങള്‍ തന്നെയാണ്. ജനാധിപത്യപരമായി വിജയം കൈവരിക്കും വരെയുള്ള സമരം. പൊതുമുതൽ നശിപ്പിക്കുകയോ പൊതുജനങ്ങൾക്ക് ബുദ്ധിമുട്ട് ഉണ്ടാക്കുകയോ ഞങ്ങൾ ചെയ്യില്ല. തികച്ചും ഗാന്ധിയൻ ആദർശങ്ങൾ മുറുകെ പിടിച്ച് കൊണ്ടായിരിക്കും ഞങ്ങൾ സഞ്ചരിക്കുന്നത്. ഞങ്ങളുടെ പ്രവർത്തികൾ തികച്ചും നിയമപരവും സത്യസന്ധവും സമാധാന പരവും ആയിരിക്കും. മുല്ലപ്പെരിയാർ വിഷയം ഉന്നയിച്ചുകൊണ്ട് കേരള മുഖ്യമന്ത്രി ശ്രീ പിണറായി വിജയനും പ്രതിപക്ഷ നേതാവ് ശ്രീ വി.ടി.സതീശനും തമിഴ്നാട് മുഖ്യമന്ത്രി ശ്രീ എം.കെ.സ്റ്റാലിനും പ്രതിപക്ഷ നേതാവ് ശ്രീ എടപ്പാടി പളനിസാമിക്കും ഇന്ത്യൻ പ്രധാന മന്ത്രി ശ്രീ നരേന്ദ്ര മോഡിക്കും പ്രതിപക്ഷ നേതാവ് ശ്രീ രാഹുൽ ഗാന്ധിക്കും നിവേദനം സമർപ്പിക്കും.